ارتاحت صفاء على كرسيها وهى بتحاول ترتب المهام اللى وراها بعد قسط من الراحة...فسمعت اللى بينادى من بعيد...صفاء...صفاء
قطعت صفاء صفائها والتفتت لألاء أختها الصغيرة
صفاء: نعم يا الاء
ألاء(بلغة عفوية جدا): انت ماشفتيش المثلث ال right angle بتاعى...انا مش لاقياه وامتحان ال math بكرة
صفاء:ماشفتهوش دورى تانى كويس وانتى تلاقيه ان شاء الله
راحت الاء تدور تانى على المثلث فى نفس الوقت رجعت الأم من مشوارها و قعدت على الكرسى اللى جنب المدخل وكأنها بترمى كل همومها عليه
ألاء: ماما المثلث الright angle ضايع و دورت عليه مش لاقياه...بصى انا ما لقيتش غير ده
واعطت لها مثلث غير اللى هى بتدور عليه
الأم: هو يعنى ده مش يقضى الغرض يا ألاء
الاء:اه يعنى
الام: خلاص الحمد لله ان معاكى واحد
سابت ألاء المثلث وكأن الكلام ما عجبهاش ودخلت تدور تانى ..وفضلت تزعق وتنده على صفاء
الاء لصفاء: انتى سايبانى ادور لوحدى تعالى دورى معايا
صفاء: انا مش فاضية انا ورايا حاجات اعملها انتى يتزعقى ليه هو انا اللى ضيعته ..دى حاجتك وانا مش مسؤلة عن ضياعها
و بعدين انتى مش لقيتى واحد ينفع...خلاص اشتغلى بيه
فضلت الاء تدور وطلعت صفاء من الحجرة ولما رجعت لقيت الاء مترفزة اكتر ...دلوقتى المثلثين ضاييعين مش مثلث واحد
الأم لألاء : شوفتى عشان ما حمدتيش ربنا لما لقيتى واحد اهو دلوقتى الاتنين ضايعين
وكررت صفاء نفس الكلام ورا الأم
دلوقتى الاء وصفاء والأم والاب بيدوروا على المثلث التانى اللى كان لسة فى ايديهم من دقايق ونسوا المثلث الاولانى تماما
الاب : بصى تحت المخدة دى يا ألاء انتى كنت قاعدة هنا
رفعت الام الوسادة
الأم وهى تبتسم ابسامة راحة بعد عناء: اهو هنا .. و الاولانى اهو كمان...قولى الحمد لله بقى
صفاء وهى متعجبة جدا: يبقى التانى ما ضاعش غير عشان ربنا عايزنا نلاقى الأولانى معاه
.....................................................................................
قد تكون صفاء فى بادىء الأمر رأت أن الحكمة مما حدث أنتتعلم الاء أن تحمد ربها فى السراء والضراء وان ترضى بالقليل وان لم يعجبها
الا انها فى النهاية رأت أنه كانت لله حكمة أخرى
فقد يمنع عنا ليعطينا او يؤخر عنا ليفتح لنا فتحا مبينا
جلست صفاء تسطر تلك الكلمات فى سطور بدت لها طويلة ولا تدرى ما الحكمة الأن فى ذلك الا ان انها تعلم ان الله وحده يعلم
مهما تخيلت أنك تدرى فأنت لا تدرى هل ما توصل اليه تفكيرك هو فعلا الحكمة مما يحدث لك أم أن هناك وراء الحكمة حكمة أخرى ..حكمة العليم الحكيم
ليست هناك تعليقات:
إرسال تعليق