قالوا لها( وكأنهم مايعرفوش!!): وفيها ايه يعنى؟؟
قالت لهم : فيها كتييير!!
قالوا لها : معلش دى مرة ...وتفرحى مع صحابك
قالت لهم : انتوا بتتكلموا فى ايه..لأا يعنى لأا
قالوا لها : خليكى كدة قاعدة زيك زى الكرسى
قالت لهم : أنا بحب الكرسى
قالوا لها : طيب ايه وجهة نظرك يعنى!؟؟
كانت هتقولهم كلام يوجع لأنهم أصلا عارفينه بس سكتت عنه
و قالت لهم : هو كدة ...هتقولوا " كدة ليه ؟" ...هأقولكم : "كدة لأا"...هتقولوا لى: "لأا ليه؟"..هأقولكم
"لأا عشان كدة!!"
أيوة قولى هأحترم حجابى ...أيوة وقّفى كل واحد عايز يتعدى حدوده أو عايزك انتى تتعدى حدودك و اديله على دماغه...أيوة بصى فى عين كل واحد يعترض على الصح كدة بقلب جامد و قولى له أنا مش هأعمل غير الصح...هيقولوا معقده....هيقولوا غريبة .....هيقولوا عليكى كوبة....هيضحكوا عليكى
سيبيهم يضحكوا...سبيهم يقهقهوا ....سبيهم يا ستى يسخسخوا على نفسهم من الضحك ...هيجى رجل عنده 45 سنة بعد ما توسعى طرحتك شوية ( ربنا يصحح له نظره يا رب) و يقولك" يا خالتى" ( و هو لو كان ربنا قدر له يتجوز بدرى شوية بس ...يمكن كان خلّف بنت فى سنك) ادعيله يا بنتى دعاء الخالة إن شاء الله مستجاب.... عادى جدا هتكونى أول واحدة مستبعدة من لستة الخروجات اللى صحابها عارفين انك مش هتوافقكى على اللى بيحصل فيها ما تفتكريش انهم مش بيحبوكى ومش عايزينك فى قعدتهم دول بيموتوا فيكى لأن اللى عنده مبدأ صح و ثابت عليه عشان خاطر ربنا.....ربنا بيحببه عند خلقه...هم بس عايزين يزقطتوا على طريقتهم اللى هى مش طريقتك.......خليكى ثابتة و قولى هأخرج من بيتى باحترامى
خليكى ثابتة و قولى مش خون ربنا و لا بابايا اللى خارجة من بيته و هو عارف إنى رايحة فى المكان الفلانى مع فلانة و فلانة و فلانة و لو صادف أى تغيير احنا ناس مرنة تليفون صغير تبلغى البيت ان الخطة اتغيرت طبعا هتفهميم انها اتغيرت لفين مش تقولى لهم اتغيرت بقى و كأنك عملتى اللى عليكى من غير ما تطمنيهم اتغيرت لإيه و بعد كدة تروحى مارينا مثلا بحجة ان أنا قولت لكم إن
" الخطة اتغيرت"!!
و لو صادف وحضرتى فرح مختلط و حد قال لك انتى قاعدة كدة ليه ما تقومى تتحركى لك شوية
قولى لهم : لأ أنا مرتاحة كدة
فى ناس جميلة هتستجيب لك و تؤثر راحتك على أى حاجة تانية أو لأنها بتبقى عارفة إن ده الصح
وفى ناس جميلة تانية بس المفاهيم عندهم مختلفة شوية عن اللى عندك فهتلح عليكى وتحاول تحرجك و تقولك: انتى مش عايزة تفرحى معانا و لا إيه؟
( و كأن الفرح ما ينفعش يتعبر عنه غير بطريقتهم دى)
قولى لهم : أنا فرحانة و أنا قاعدة كدة
وفى ناس جميلة تالتة بقى هتعوز تستفزك فهتقولك خليكى قاعدة كدة زيك زى الكرسى
بصى فى عينيهم كدة و طلعى كل الشرار اللى تقدرى تطلعيه و
قولى :لأا مش هأقوم...( وابتسمى ابتسامة "إن كيدهن عظيم " دى...طبعا عارفاها مش محتاجة أوصفهالك)... و كملى بقى :أصل أنا بحب الكرسى
أيوة كدة بكل قوة بس بأدب من غير ما تشخطى فى الناس يعنى....بس خليكى حازمة و انتى بتقوليها خليهم يعرفوا انهم مهما قالوا مش هيأثروا عليكى وان الموضوع محسوم بالنسبة لك
هيقولوا لك: ليه؟
( و كأنهم ما يعرفوش!!!!)
هتحسى انك كدة عايزة تقولى لهم كلاااااام كبيييير كتيييير
بس أنا بقترح عليكى انك تكتفى بإنك تقولى لهم : كدة
هيقولوا لك : كدة ليه!!؟
هتقولى: كدة لأا
هيقولوا لأا ليه : هتقولى لأا عشان كدة!!
اوعى تنسى الترتيب ده
"كدة!...كدة ليه؟...كدة لأا!...لأا ليه؟..... لأا عشان كدة!!"
بسيطة مش كدة؟؟
وفى النهاية هم كلهم ناس جميلة و مهما عملوا هيفضلوا صحابك و أهلك اللى بتحبيهم يمكن مش هتحبى شوية حاجات بيعملوها بس هتفضلى تحبيهم هم طول عمرك و تفرحى لهم دايما....بس على طريقتك
26-7-2010
________________________________________________
فى الفيديو ده
من أول الدقيقة
(6:20)
حتة عن البنت المأفلة...لما حد يقولك انتى مأفلة بعد كدة ...افرحى
