رسالة إلى ندى
السلام علينا و رحمة الله و بركاته
يمكن دي أول رسالة أكتبها لـيكى يا "ندى" و يمكن تكون متأخرة حبتين بس أنا كمان كنت تعبانة زيك
اوعي يا "ندى "تفتكري إني بكون مرتاحة و انتى حاسة بالكمية الفظيعة دي من المشاعر المتناقضة أنا أول واحدة بتأثر بتعبك ده...لأنى بحس بالعجز...انتى بجد مش متخيلة كمية الألم اللى ممكن يسببها احساس زى ده ليا
اللي تاعب "ندى" مش إنها عايزة حاجة معينة لكن إنها عايزة الحاجة دي تتم بطريقة معينة و واضحة و عندك حق في إنك عايزة كل حاجة فى حياتك تمشي بطريقة صح।
ندى احنا بشر و البشر من طبيعتهم إنهم بيحسوا و كونك بتحسي بمشاعر سلبية أو ايجابية تجاه حاجات فى حياتك فده شئ طبيعي و لازم يحصل , لكن هوني على نفسك مش معنى إنك ما عندكيش الطريقة الصح اللي تعبرى بيها و ان ساعات المواقف بتبوظ منك لأن "ندى" إما إنها بتتنرفز و إما إنها بتقفل على نفسها و ما تتكلمش إنك تفضلي تلومي" ندى اللى بتحس" على إنها بتحس و تعاقبيها و كمان بتزيدي في القسوة عليها و تجبريها على إنها تبطل تفكير في حاجة هي حاسة بوجودها جواها و الأكتر من كدة كمان بتفضلي ماسكة لها كرباج أحسن تحس تانى عشان انتى يا "ندى ياللى عايزة الأمور تمشى صح" خايفة من انك مش هتعرفى تتصرفى مرة تانية و لأنها طبيعي بتحس فبتكرر الأحاسيس فى مواقف مختلفة و برضة بيتكرر معاه نفس أسلوبك معاها و نفضل دايما عايشين فى خناقة و طول الوقت متضايقين, انتى متضايقة من إنها بتحس و هي متضايقة من إنك مش قادرة تقبلي احساسها ده و أنا دايما واقفة بتفرج ما بأخدش أى خطوة, انتى مستمرة فى القسوة وهى مستمرة فى البكاء و أنا مستمرة فى العجز ! و فى النهاية احنا التلاتة بتسبب فى تنغيص سعادة
"ندى"! .
فلازم "ندى اللى عايزة الأمور تمشى صح" تعرف إن "ندى اللى بتحس" من حقها تحس و إن ده شئ طبيعي
و لازم "ندى اللى بتحس" تعرف إن " ندى اللى عايزة الأمور تمشى صح" مش قصدها تكبت" ندى اللى بتحس" إنما هى خايفة لأحسن الأمور تمشى غلط لأنها وعدت "ندى" انها مش هتخذلها و هى خايفة من إن " ندى اللى بتحس" تخليها تخل بوعدها ده।
أما عنى أنا " ندى اللى فى النص" و اللى بتحب" ندى اللى بتحس" و بتحب برضه "ندى اللى عايزة الأمور تمشى صح" لكنها دايما بتقف تتفرج فخلاص ما ينفعش بعد كدة تقف تتفرج تانى , لازم دايما تفكر" ندى اللى بتحس"و "ندى اللى عايزة الأمور تمشى صح" إنهم ما يقدروش يعيشوا من غير بعض...و إن "ندى" تستحق مننا احنا التلاتة اننا نحبها و إننا نسمع بعض عشان نوفر لندى شوية سلام.
"ندى"
إحنا آسفين إننا سببنا لك ألم فى يوم من الأيام...احنا بنحبك...بس ما كناش عارفين نتصرف...سامحينا.
ندى و ندى و ندى
------------------------------------------------------------------------
رسالة من ندى
و علينا السلام ورحمة الله و بركاته
ندى و ندى و ندى...
"ندى اللى بتحس" و " ندى اللى فى النص" و "ندى اللى عايزة الأمور تمشى صح و على أكمل وجه"
أنا عارفة أن كل واحدة فيكم بتحاول تثبت لى إنها عايزانى أكون سعيدة يمكن سوء التفاهم حصل لأنى ما قولتش لكم قبل كدة إيه هى السعادة بالنسبة لى و بالتالى كل واحدة فيكم تخيلت شكل معين لسعادتى و بدأت تجتهد فى دورها
يا "ندى ياللى بتحس" سعادتى مش فى إنى أرتب أمورى على أحاسيسك
يا "ندى ياللى عايزة الأمور تمشى صح" سعادتى مش فى إن نسبة الخطأ فى أدائك تكون صفر
يا "ندى ياللى فى النص "سعادتى مش فى إنك تسيبى كل واحدة منهم هم الاتنين تعمل اللى هى عايزاه
سعادتى يا ندى و ندى و ندى هى فى التوازن...محتاجة أحس ...و محتاجة أمورى تتم بطريقة صح...و محتاجة إن ده ما يتعارضش مع ده...لكن خلينا واقعين لأنه طبعا بيكون فى تعارض فى احيان كتيرة , عشان كدة التوازن بينكم هو السعادة لأنه هيخلينى مرتاحة ...لكن لأن كل واحدة فيكم ما كانتش قابلة التانىة و "ندى اللى فى النص" ما كانتش بتفصل بينكم كنت بضطر أخلى كل واحدة فيكم تسكت عشان أنا كنت تعبانة...لكن ده ما كانش بيحل أى حاجة بالعكس ده كان بيزود التعب أكتر.
الحمد لله مبسوطة إنكم اتفقتم تقبلوا بعض حتى لو مختلفين مع بعض و إنكم هتكونوا إيجابين...و أنا إن شاء الله مش هأطلب منكم تسكتوا تانى طالما إنه ما فيش تطرف فى دور أى حد فيكم انا كمان بحبكم و بحمد ربنا إنكم موجودين جوايا .
ندى و ندى و ندى السلام حالة نقدر نعيش بيها فى الحزن و الفرح , فى المشاكل و فى غير المشاكل , احنا اللى بنقرر هل هنسيب الأوضاع تختار لنا حالتنا و لا احنا اللى هنختار الحالة اللى عايزين نعيش بيها أوضاعنا.... و أنا أختار سلام الله....يا رب نعيش فى سلام و بسلام و على سلام .
ندى
1-3-2011
