(1)
تليفون البيت تررررن... ترررررن
-رفعت السماعة وقلت :سلام عليكم
رد راجل صوته يقول انه أربعين خمسين سنة كدة و بيشرب سجاير
- وعليكم السلام ..كريمة موجودة
- لا والله النمرة غلط
-مش ده منزل طارق
- لا حضرتك النمرة غلط
- مش دى نمرة كذا كذا كذا
- اه حضرتك بس ده مش بيت طارق
قام اتنرفز و زعق
- لأااااا ده بييييت طااارق .. و على صوته كمان وكمان وهو بيكمل كلامه بلهجة كأن فى جريمة و هو بقى اللى كشف حلها
"و انتى أووووختى كريـــمـة"
O_O
- طييييييب.....سلام عليكم
طاخ
(فعلا صعب عليا...و صعبت عليا أكتر أخته كريمة ..أحسن يروح يتعارك معاها ويقولها انتى قفلتى فى وشى السكة!!!!)
(2)
ليلة امتحان أناتومى نبات اعدادى صيدلة
ما ينفعش أقفل موبايلى لأن أنا و صحابى بنبعت لبعض نسأل عن حاجات فى المنهج
(طبعا الطلبة اللى بيذاكروا ليلة الامتحان فاهمين كويس أنا بتكلم عن ايه )
رن الموبايل
نمرة غريبة
- سلام عليكم
- صوت دوشة وعيال كتيرة
قفلت
رن تانى... طلع واحد فاضى ...عملت الموبايل سايلنت وسبته ... و أخوكم ده ما بطلش رن لحد الساعة 3 صباحا
42
MISSED CALL
اتصلت بخدمة العملاء وسألتهم اذا كان ينفع أعمل حظر لرقم معين انه يتصل بيا...قالى لأ بس حضرتك ممكن تاخدى رقم مباحث التليفونات وتديهم الرقم
جوايا:
(يااا سلاااام ...هو فى حاجة أصلا اسمها مباحث التليفونات.....كانت فين دى من زمان )
أخدت الرقم
فى أخر مرة بقى رديت على أخوكم الفاضى : بص حضرتك اتصل تانى و نمرتك باذن الله هتكون مع مباحث التليفونات
(ناس ما بتجيش غير بالعين الحمرا ...لو عايزين نمرة مباحث التليفونات...ما تغلاش عليكم...من العين دى قبل العين دى)
(3)
طريقة سخيفة رقم واحد: واحد فاضى يتصل و يسأل سؤااال بايييييخ: انتى تعرفى فلانة
(اسم)
وغالبا اسم فلانة اللى بيستخدمه بيكون اسم منتشر جدا بحيث ان انتى لو دورتى أو حتى لو ما لحقتيش تدورى هتلاقى فى صحابك بنت اسمها فلانة!!!
سارة....هبة....ياسمين... دينا...دعاء ...والذى منه
الطريقة سخيفة رقم اتنين
واحد فاضى _برضه_ يتصل ويتكلم بكل لباقة(بس على مين؟؟...خلاص اتعلمنا..ما بتخدعناش اللباقة ) : الرقم ده حضرتك اتصل عليا
(سواء موبايل بقى أو بيت....بجد ببقى هأتشل)
طيب يا سيدى الفاضل... بفرض ان انا فعلا اتصلت بيكم مع انه ما حصلش...لو أنا عيزاكم هأبقى اتصل تانى!!!!! ....طالما معايا النمرة...بلاش بقى الحركات دى
وفى ناس فاضية بقى تفضل تسأل أسئلة تحقيق ومن كتر ما قلت لها النمرة غلط يبقى فاضل بس انك تقول... ال ن م ر ة غ ل ط ....هذه رسالة مسجلة
(4)
الساعة تلاتة بعد نص الليل
موبايل ضحى أختى الصغيرة رن وهى نايمة
ما ردتش فى الأول قلت يمكن صحابها بيرنوا
رن تانى ... لقيتها نمرة...رديت
- سلام عليكم
صوت شاب... و كأنه ارتبك لما لقى صوت واحدة بترد عليه
وكان بيتكلم بكل لباقة
(احنا قلنا فى رقم 3 بقى... ما تخدعناش اللباقة)
- لو سمحتى الرقم ده رن عليا
( فاكرينها دى الطريقة اللى قلت لكم عليها سخيفة فى رقم 3)
- لا حضرتك ما رنش...انت عارف الساعة كام دلوقتى حد يتصل بحد فى الوقت ده!!
- طيب انتى تعرفى واحدة اسمها ياسمين
(دى برضـــه الطريــــقة اللى قلت لكم عليها سخـــيــــفة فى رقم 3...معايا؟....وبما ان فيه فى حياتى أكتر من ستة اسمهم ياسمين....فبصراحة استفزنى جدااا...وكنت هأدخل فيه شمال ...بس أنا سمعت الصوت ده قبل كدة...فين يا ربى...فين يا ربى)
-شخطت : ياسمين ايه؟؟؟
( ومن الواضح ان ما عندهوش خبره خالص فى موضوع المعاكسات التليفونية_ نحسبه على خير _فبكل حسن نية قال اسم أخته الصغيرة اللى هى بنت عمى)
-ياسمين مجدى
(بس خلاااص ...عرفتــــك)
- انت كريم عباس؟
رد باستغراب
- أيوة!
- كريم....أنا ندى عباس
(طبعا الباشمهندس كريم _باعتبار ما سيكون ان شاء الله_ التقط أنفاسه... و كأنه عايز يقول مش كنتى تقولى من الأول)
- هى جت فيكى....معلش احنا أسفين...بس دى نمرة مين
- حصل خير يا كريم....دى نمرة ضحى... ابقى خلى ياسمين بقى تسجلها عندها....سلم عليهم كلهم سلام عليكم
- يوصل ...و عليكم السلام
يعملوها الصغار ويقعوا فيها الكبار.....يا رب يا ياسمين تكونى سجلتى نمرة ضحى عندك....ولو انى مش مستبعدة_ او أقصد انى شاكة بنسبة 95%_ ان ضحى ممكن تكون هى اللى سجلت نمرتها عند ياسمين أكتر من مرة(عااااادى جدا...الأطفال أحباب الله) فبقت تظهرعلى شاشة الموبايل نمرة مش اسم
(5)
موبايل أختى الكبيرة رن ولما ردت
طلع واحد عايز رامى
(جديدة دى ...قال اسم واحد مش واحدة)
قالت له: النمرة غلط
السؤال البايخ المعتاد: طيب ده موبايل مين؟
( بعد السؤال ده كدة نقدر نوصف بقى الوصف الدقيق ... واحد_ فاضى _ عايز رامى)
فردت : موبايل أى حد تانى غير رامى!!!!!
20-2-2010
