1- النقاب
من الجهة الاسلامية فى ارا مختلفة لعلما الدين من حق اى واحدة تاخد بالانسب لها
من الجهة الأمنية الأمن المصرى يوم ما بيعوز يجيب حد بيعرف يجيبه ولو النقاب عامل مشكلة امنية فده ان دل على شى فهو يدل على قصور فى الأمن لو قلنا ان النقاب طريقة من طرق التخفى فيا ريت باروكات الشعر وعدسات العيون الملونة يتلغوا هم كمان و اعتقلوا بقى دكاترة التجميل وما تنسوش تقفلوا الكوافيرات بالمرة وتمنعوا استيراد الماكياج .. واسأل اى راجل اتخدع فى شكل واحدة بمكياج قبل كدة وما اكتشفش الحقيقة غير بعد فوات الأوان
2- الشيوخ والدعاة
بصراحة من رمضان وانا كاتمة فى قلبى ومش عايزة أتكلم بس أعمل ايه مش قادرة أكتم أكتر من كدة كفاية بقى نظرات تصنيفية للدعاة ...ده اصله لحيته مش عارف عاملة ازاى...ده أصله اسلوبه شديد...ده اصله منفتح أوى....يا عالم ارحمونا بقى اللى عاجبه شيخ معين يسمعه وربنا يوفقه واللى مش عاجبه شيخ تانى مايسكت ...يا ناس ما تقولوش كلمة وحشة فى حد.....بالذات أهل العلم ويا ريت ما ننساش انهم بشر و معرضين للخطأ...ويا سيدى لو انت شايف ان عنده خطأ فى مقولة ما او فى فعل ونقحت عليك النخوة روح دور على نمرته ولا عنوانه وجاهد عشان تنصحه مش تقطعلى من كلامه فيديوع اليوتيوب وتقول احذروا فلان الفلانى...والناس بقى اللى فرحانه بالفوتوشوب والموفى ميكر وعمالة تزوقلى فى الفديوهات وانصار مش عارف ايه وتكتب عنوان الفيديو الداعية الفلانى يرد على الداعية الفلانى....يا ناس اذا كان من قتل نفس واحدة فكأنما قتل الناس جميعا... وربنا بيقول الفتنة أشد من القتل...يعنى لما حضرتك تعمل فتنه تبقى عملت ما هو أكبر من قتل الناس جميعا
عمرو خالد...عندما يصبح للعمل صوت
محمد حسان.... عندما يتحدث العلم من زواياه المتعددة
محمد حسين يعقوب عندما تتحد الشدة والرحمة فى رجل واحد ... نفسى بس حد يسمعه وهو بيشرح مدارج السالكين وبيتكلم عن الاخلاص و علم القلوب
مصطفى حسنى .....ما أنقى حديثه وهو بيتكلم عن نبذ تصنيف الناس لأهل طاعة وأهل معاصى...لانه فى الحقيقة كلنا بنعصى...لاننا فى الحقيقة بشر
معز مسعود ...عندما يتحدث العقل فالقلب والعقل بيسمعوا
الدكتور راتب النابلسى...عندما تتحد سلاسة الروح و سلامة العقل وهدؤ القول على التوحيد يخرج منه الكلام وكأنك تسمعه لأول مرة حتى لو كنت سمعته 100 مرة قبل كدة
دكتور محمد هداية...عندما توقن أنك جاهل باللغة العربية لغة القران وان ايات القران تحمل الكثيييير والكثييير فأمامك عالم من علما الارض ينبغى امامه ان تنصت له بكل حواسك
تحياتى لكل صاحب قولة حق...ربنا يرزقه الجنة
27-10-2009
