الخميس 12-11-2009
________________
كان عندى احساس رهيب انى لازم أخرج من جو المذاكرة اليوم ده عشان ما يجيليش اكتئاب بعد كدة ...خلصت محاضراتى فى مبنى صيدلة الساعة 11:30 صليت الظهر ورحت عشان اشوف ريهام صاحبتى دكتورة امتياز بمستشفى الشاطبى وما كنتش عايزة أكلمها غير لما اوصل هناك عشان تبقى مفجأة.... فى السكة كلمتنى مى أختى و طلبت منى انى اجيب لها على سكتى من مكتبة اسكندرية رواية الشهر ده من مشروع القراة الكبرى وكان اسمها
((عناقيد الغضب))
وبعد ما دفعت تذكرة الدخول ووقفت فى طابور طويل عريض فى الامانات عشان اسيب حجاتى هناك...وبعد ما وقفت على بوابة التفتيش ....ادخل عند الموظف عشان يقولى بكل بساطة ان الراوية هتكون موجودة الساعة 7 باليل
ياسلااااام طيب بالنسبة لعناقيد غضبى دلوقتى المفروض يكون شكلها عامل ازاى....تداركت نفسى وقلت معلش قدر الله وماشا فعل...بقيت لى ريهام ورؤيتها هتكون كافية جدا انى أنسى اى حاجة زعلتنى النهاردة
اتصلت بريهام فلقيتها بتقولى انتى فين انا كنت عندك فى الكلية واتصلت بيكى و لما ردتيش افتكرتك ما رحتيش الكلية النهاردة اصلا... سألتها اذا كانت لسة فى الكلية قالت لى لأ أنا خلاص روحت
ساعتها جه فى بالى كل الافلام والمسلسلات اللى البطل بيروح للبطلة فى نفس الوقت اللى هى بتكون فيه نزلت ورايحة له وطبعا مش بيشوفوا بعض أو زى ما قالت ريهام البوليس اللى بيوصل بعد ما الحرامى يكون هرب
مشوار ما طلعتش منه بأى حاجة من اللى كنت رايحة عشانها ...اكيد كان فى سبب لوجودى هناك و مش معنى انى ما اعرفهوش انه ما كانش فى سبب!!
الخميس 19-11-2009
_______________
وانا راجعة فى المواصلات الساعة 9 ونص باليل ركبت جنبى واحدة عندها حوالى 22....25 سنة كدة...من أول ما ركبت وانا حاسة فيها بحاجة غريبة...وكان عندى حق.....فجأة لقيتها بتقولى ممكن أطلب منك طلب...ابتسمت وانا مترددة وقلت لها اتفضلى...طلعت موبايلها وقالت لى ممكن تكلمى بابا وتقولى له ان انا اتأخرت عشان كان فى عزومة فى الشغل وعشان كدة اتأخرت...قلت لها طيب ما تكلميه انتى...قالت لأا ما هو هيزعق لى...قلت لها طيب أنا هأكلمه بصفتى ايه...قالت لى بصفتك صاحبة الشغل....قلت لها اسفة مش هينفع... سكتت وانا حاسة انه لو بايديها تضربنى كانت ضربتنى...قلت لها كلمى صاحبة الشغل اللى أخرتك تكلمه...ما ردتش ...دقيقتين كدة وقامت اتصلت هى ب باباها :ايوة يا بابا انا فى السكة اهو...والظاهر انه ما عطهاش اى فرصة للكلام...فضلت تقول له معلش ...اصل كذا حصل .و...و.. وصلت بيتنا و نزلت من المشروع وانا مش عارفة ألومها هى على تصرفها وطلبها الجرئ ده...ولا باباها اللى ممكن معاملته تخليها تطلب طلب زى ده من واحدة ما تعرفهاش
_______________
الخميس26-11-2009
كل سنة وانتم طيبين ...عيد أضحى سعيد
