أيوة يا رب فاكرة...فاكرة يا رب يوم لما ماما راحت للدكتور وسابتنى أنا و أختى عند عمى ...يومها بكيت كتير أوى....فاكرة يا رب يوم ما رحت المدرسة أول يوم وفضلت أعيط وكنت متخيلة إن دى نهاية الحياة ....فاكرة يا رب يوم ما خالو توفى وأنا لسة يا دوب تمن سنين وحسيت يومها كأن حد طلع قلبى من مكانه وعصره قدامى....فاكرة يا رب كل الأيام اللى عيطت فيها فى المطار...فاكرة يا رب يوم ما رحت درس العربى و قالوا لى إن زميلتنا رندا ماتت و مشيت يومها أعيط فى الشارع.... فاكرة يا رب يوم لما سبت صحابى و رحت مدرسة الثانوى الجديدة وقعدت أعيط لوحدى فى أخر صف..فاكرة يا رب يوم لما طلبت من أختى الصغيرة تجيبلى مستيكة واتأخرت و فضلت أجرى بين البلكونات أعيط و أنادى على الجيران"ما شوفتوش ضحى؟" و طلعت فى الأخر بتجيب لى خاتم هدية عيد ميلادى وعملاها لى مفجأة ...فاكرة يا رب لما عملت لهم مناحة فى البيت و قلت لهم مش هأروح امتحان الأحياء فى ثانوية عامة و رحت وحليت الحمد لله ونجحت و جبت مجموع عالى....فاكرة يا رب فى اعدادى صيدلة لما هريت نفسى عياط بعد لما الدكتور ما رضاش يمتحنى عشان وصلت المعمل متأخرة خمس دقايق وكنت متخيلة إن مستقبلى الدراسى خلاص ضلم و تانى يوم امتحننى وكان امتحان أسهل من اللى صحابى امتحنوه...فاكرة يا رب لما الراجل بتاع التاكسى كلمنى ببلطجة و رجعت مخنوقة و قعدت أعيط لك أدعى عليه و أدعى على كل راجل متخلف ما بيعرفش إزاى يكلم القوارير ....فاكرة يا رب لما قعدت أعيط لماما فى أولى صيدلة و أقول لها مش بحبها مش عايزاها... سيبينى أروح كلية تانية... هتشوفى درجاتى عاملة ازاى السنة دى مش هعدى و فى ساعتها والدمعة لسة ما نشفتش من على خدى تليفون بيتنا رن وكانت ندى صاحبتى و قالتلى مبروووك يا نووودى جبتى جيد.... فاكرة يا رب لما تيتة ماتت و كنت فاكرة إنى كبرت خلاص وهأقدر أمسك نفسى و أول ما وصلت و دخلت بيتها ما قدرتش أمسك نفسى من العياط ....فاكرة يا رب اليوم الطوييييييل اللى فضلت أعيط لك فيه عشان ماكنتش عايزة أقابل العريس إياه فطبطبت عليا بآية كانت شغالة على الراديو (( أولم يكفِ بربك أنه على كل شىء شهيد))..فلقيتنى بقول ( بلى يا رب كفى و كفى و كفى)...فاكرة يا رب نفسى فى كل ليلة امتحان لما بأكون على مخنوقة وعلى أخرى وبحس إن دى ليلة طويلة مش هتعدى و بتعدى برحمتك يا رب.
افتكرت يا رب ...سامحنى يا رب إذا كنت نسيت...سامحنى يارب عشان فى كل مرة باعيط فيها بكون مش فاكرة غير الوجع اللى حاسة بيه...سامحنى يا رب عشان لما بكون موجوعة بيكون عندى خوف من الأمل...سامحنى يا رب عشان ساعات كتير ما بشوفش حالى غير من دايرة ضيقة...سامحنى يا رب على مرة عيطت فيها من غير ما أحسن الظن بيك
6-10-2011
