واحنا صغيرين بتكون عندنا بعض المفاهيم والتصورات احيانا هبلة... احيانا مأساوية وطبعا فى كلا الحالتين بنضحك على نفسنا لما بنكتشف انها بعيدة كل البعد عن الواقع
(1)
لما كنت صغيرة كنت دايما اسأل نفسى عن ميكانيكة وضع دبوس الطرحة اللى في طرحة كل واحدة محجبة
وكنت بتألم جدا لما اتخيل ان كل واحدة محجبة بتحط دبوس صغير بتغرسه فى راسها!!!
(2)
لما كنت صغيرة كان عندى ايمان تام ان كل بنى ءادم بيكون عنده اسم وهو صغير ولما بيكبر بيغير اسمه
وكنت دايما اقول لما هأكبر هيبقى اسمى جيهان معرفش ليه يعنى
(3)
دائما من صغرى مؤمنة بأن التجربة خير برهان
و ده اللى حاولت اطبقه فى حياتى الطفولية
بعد ما عملت اللوز واللحمية فى سنة تالتة ابتدائى عمتى حبيبتى جابتلى هدية منبه جميل اوى على شكل وردة اورانج واقفها على عودها الاخضر
وكنت بحب المنبه ده اوى
وفى يوم كان من سوؤ حظ المنبه انه ظهر فى مجال رؤيتى بجانب سلك كهربائى من العدة بتاعة بابا اللى بيشيلها فى البيت تحسبا لاى عطل فى البيت
وكان السؤال الطفولى : بابا هو ليه مش بنشغل المنبه ده بفيشة فى الكهربا..زيعنى ليه يا بابا ما احطش فرعين الطرف ده من السلك مكان طرفين الحجارة فى المنبه و فرعين الطرف التانى فى الكهربا
بابا محذرا بحنان: اوعى تعملى كدة الحجارة دى بتدى المنبه كهربا على قده لكن السلك هيحرقه
طبعا اختكم ما كدبتش خبر وانتهزت فرصة دخول بابا اوضته وجريت اعمل تجربتى الفذة وما كان من المنبه الا انه فرقع فى وشى و قلبى وقع فى رجليا
(4)
لما كنت صغيرة كنت متخيلة ان السما وهى قافلة مع البحر دى نهاية البحر وان احنا لو دخلنا فى البحر لجوة هنلاقى حيطة من السما فى الاخر...و بعد ما اتنورت وفهمت ان فى قصادنا ناس تانية وان السما بعيدة جدا وان الارض مكورة...ظهر عندى سؤال تانى طيب هى الشمس بتروح فين لما بتفضل تنزل وكأنها بتتزحلق من على السما وتغطس فى البحر ...عرفت ...بس من ساعتها عندى امنية انى اقف فى النص عند خط الافق واشوف اللحظة اللى الشمس فيها بتكون بتغرب عندنا وتشرق فى مكان تانى
18-4-2009
ليست هناك تعليقات:
إرسال تعليق