قهوة مزيفة

أنا و القهوة اللى فى فنجان لسة متعرفين على بعض من سنة و بقول اللى فى فنجان لأنى اتعرفت على القهوة قبل كدة بس القهوة اللى فى البونبونى و لحد دلوقتى بونبونى القهوة هو البونبونى المفضل عندى.نرجع بقى لقهوة الفنجان ...أول مرة قررت إنى أشرب قهوة كانت عشان أسهر أذاكر وبما إنى ما مبعرفش أعمل قهوة و كانت مى أختى لسة عارفة ازاى تعمل قهوة فكان طلب فنجان القهوة منها طلب زى العسل على قلبها وقفت جنب مى عشان أشوف إزاى بتعمل القهوة هى بصراحة شرحت لى حاجات كتير بس كل اللى طلعت منه إنها حاجة سهلة أوى هنعاير ماية فى الفنجان ونحطها فى الكنكة و نحط سكر على حسب الطلب و فوقيهم حبة قهوة مطحونة ونحطها على النار ونستنى عليها شوية لحد ما تيجى هتغلى نصبها....يا سلام طب ما هى سهلة أهيه أمال ندى صحبتى أعدت ليه توصف لى وصفة طويلة ما حفظتش منها ولا كلمة...و دارت الأيام ونسيت طعم القهوة اللى فى فنجان وجه يوم احتجت فيه فنجان قهوة وقلت لازم أعملها بإيديا قال يعنى بقى ست بيت شاطرة!

و حطيت المكونات على النار ولما صبتها طلعت سايبة كدة ومن غير وش...قلت جوايا إيه يعنى مش مشكلة المهم انها قهوة و هتصحصحنى أنا ما بتفرقش معايا الشكليات دى و فضلت كذا مرة لما أعمل قهوة أعملها بنفس الطريقة و تطلع بنفس الشكل والطعم وأبقى مبسوطة جدا وأنا بشربها كان إحساس فظيع بالسعادة
وجه اليوم اللى أخدت فيه الصدمة...فى اليوم ده كنت عايزة قهوة بس كسلت فطلبت من مى تعملها لى فجابتلى فنجان قهوة نسانى كل فنجايل القهوة اللى عملتها قبل كدة و شربتها و أتارينى كنت مخدوعة و فاكرة انى كنت بشرب قهوة طيب احساس السعادة اللى كنت بحسه ده كان ايه ...كان تقليد... لأن الفنجان بتاع مى كان حاجة تانية خالص...سعادة حقيقة
كل الكلام ده مش عشان أمدح فى فنجان مى و لا عشان أذم فى فنجانى... ما تقلقوش بكرة إن شاء الله أتعلم..أكيد فى أمل
بس الفكرة إن فى حاجات كتير فى حياتنا بنفتكر إن إحساسنا بيها هو السعادة ...فى حين إن السعادة الحقيقة مش كدة خالص إحنا بس عشان لسة ما دوقناش السعادة الحقيقة فبنفتكرها هى دى لكن فعلا يوم ما هندوق السعادة الحقيقة هنقول ياااه ده احنا كنا ساذجين أوى
بالظبط كدة زى ما أنا قلت لنفسى مع أول رشفة من فنجان القهوة بتاع مى و مش بعيد أكون مخدوعة برضه و تكون قهوة مى هى كمان مزيفة... و لحين اكتشاف ما إذا كانت قهوة مى مزيفة ولا لأ...حاسبوا انتوا كمان أحسن تكون قهوتكم مزيفة
:)
4-5-2010