و تجربة الشبب_أعزكم الله_ هى تجربة مبنية على مرحلتين
المرحلة الأولى:
__________
متمثلة فى إن حضرتك حتروح تلبس شبشب أخوك الصغير...بشرط إن مقاس الشبشب يكون صغير جدا على حضرتك... و تمشى بيه مدة خمس دقايق
المرحلة الثانية
________
هتخلع شبشب أخوك الصغير...وتدور على أكبر مقاس فى الشباشب عندكم وتلبسه بشرط إن المقاس ده يكون كبير جدا على حضرتك... و برضه حتمشى بيه خمس دقايق
المشاهدة
_______
1-يلاحظ فى الخمس دقائق الأولى ..إن حضرتك ما عرفتش تمشى ...أو إن سير حضرتك بطييييىء جدا ...و حضرتك حققت فيه مبدأ تحدى الإعاقة
2-يلاحظ فى الخمس دقائق الثانية.... أنه حضرتك بنسبة 95% اتكعبلت فى أول طرف سجادة قابل الشبشب اللى حضرتك لابسه
الإستنتاج
_______
1-بلاش تلبس شبشب أصغر من مقاسك عشان هتمشى ببطئ
2-بلاش تلبس شبشب أكبر من مقاسك عشان هتتكعبل فيه
3- إلبس شبشب على مقاسك....بس قبل كدة لازم تعرف مقاس حضرتك الأول عشان تعرف تلاقى لحضرتك الشبشب المناسب
إحتياطات التجربة
_________
1-فى حالة عدم وجود شبشب مقاس صغير...أو حالة عدم وجود شبشب مقاس كبير... أو حالة عدم وجودهما معا....يستعان بشبشب من أحد الأقارب أو الجيران للقيام بالتجربة...والناس لبعضيها
2-عند القيام بالمرحلة الأولى من التجربة ...لابد من توخى الحذر ..لأن أخوك الصغير لو شافك...هيلم عليك الدنيا إما بضحك هستيرى لأن منظر حضرتك هيكون مضحك جدااااا...و إما بصرااااخ أيضا هستيرى لإنقاذ شبشبه المسكين من تحت أقدام حضرتك
3-عند القيام بالمرحلة الثانية من التجربة يجب توخى الحذر أيضا...تجنب شيل الأشياء القابلة للكسر....و...الأطفال
4-و كما أضافت أختى الكبيرة ( يحظر اجراء هذه التجربة على مرضى الروماتيزم وهشاشة العظام)____________________________
طيب الهدف من التجربة دى ايييه؟؟
____________________________
مش إننا نضحك و بس و إن كان ده جزء من الأهداف بس الهدف إنى لقيت إن كل عمل بنعمله فى حياتنا شبه الشبشب لما بنلبس فيه مقاس صغير مش مقاسنا بيتعبنا... و لما بنلبس فيه مقاس كبير علينا بيكعبلنا
عشان كدة لازم نعرف مقاسنا كويس أوى فى كل حاجة مقدمين عليها
عشان لما نلبس دور و يكون ضيق علينا نبقى عارفين إن اللى مضايقنا مش إن الدور صغير لكن لأن مقاسه صغير على حجمنا.....ممكن نستحمل صغره و نصبر لحد ما نلاقى فعلا دور مقاسنا...و ممكن يكون ضيق أوى لدرجة تخلينا مش عارفين نمشى وفى الحالة دى تركه أفضل
وعشان لو غرقنا فى دور كبير ما نفتكرش إن إحنا صغيرين...لأ... كل الحكاية إنه لسة قدامنا وقت عشان مقاسنا يكبر...وفى الحالة دى إما تقرر إنك تقبل الدور الكبير بس لازم تكون عارف إنه عليك إنك تكبر بسرعة و تكون قد الدور ده...يا إما ترفضه لأنك شايف إن مقاسه الكبير دلوقتى هيكعبلك مش هيكبرك
فى رحلة البحث عن الشبشب...هنتخنق فى شباشب صغيرة كتير....و هنتكعبل فى شباشب كبيرة كتير....بس أكيد فى النهاية كل واحد فينا هيلاقى شبشب على مقاسه
12-3-2010
