في ذروة المطر

اشتد المطر و زادت قوة الرياح دعت الله أن يكمل سعادتها في تلك اللحظة و يسمعها تسبيح الرعد....لم تمض سوى دقائق حتي جاءتها الإجابة لكنها كانت صوت كروان في ذروة المطر
3-3-2010

جغرافيا

كان يوم جمعة جميل قضيناه أنا وأسرتى مع عمتى الكبرى والصغرى ببيتنا فى اجازة نصف العام ..كان يوما جميلا من كل النواحى من ناحية أنه جاء بعد انشغال الجميع لفترة طويلة ...و كان جميلا لأنى خرجت من المعمل أخيرا و دخلت المطبخ شوية...وكان جميلا لأننا جلسنا سويا بعد تناول الغذاء نتحدث ...أعشق تلك الأحاديث... لسنا نتحدث عن شىء بذاته أو موضوع محدد لكن تبادل أطراف الحديث بيننا فى حد ذاته يجعلنا نتواصل وعندما نضحك أشعر وكأن هذه الضحكات تضمنا سويا بحضن خفيف تملئه المودة

حسنا ما علاقة ذلك بالجغرافيا!!؟؟

عادة نحن جيل الأبناء نعرف أن أصولنا بدأت بالصعيد حيث كانت نشأة جدنا لأبى هناك...لكن من (فين)...(ما خبرش)...وعندما كانت تتحدث جدتى كانت تقول( احنا عندنا فى البلد)....(أنهى بلد دى بقى...برضه ما أعرفش)....فى العام قبل الماضى جاءت لزيارة جدتى قبل وفاتها بعدة أشهر ابنة خالتها وبناتها وعلى حسب ما سمعت من ضيوف( تيتة) أنهم من المنصورة (و أخيرا عرفت اسم البلد اللى تيتة على طول كانت بتحكى عليها) ...فين المنصورة دى بقى...(انتوا أكيد عارفين)....و فى يوم الجمعة هذا الذى تجمعنا فيه تناولنا أحداث كثيرة عن أقاربنا و عن السفر و عن.. و عن.. و عن.. حتى سار بنا الحديث الى الصعيد و المنصورة ودائما اذا جرى الحديث عن أصول جدى وجدتى تجتمع كلمة الصعيد و المنصورة فسألت أبى عن المنصورة (البلد اللى تيتة بتقول عليها على طول بلدها)...قال أبى (فى محافظة الدقهلية)....حسنا(اللى هى فين دى يا بابا)....( وجه بحرى ناحية بورسعيد والاسماعيلية كدة)... تلقيت الاجابة وكتمتها فى نفسى... ضحكت عمتى الصغرى و هى تشير لابنتها(أولى جامعة) و قالت:( المدرس بتاعها كان بيسألها انتوا منين أصلا ... قالت له من الصعيد ..قالها منين من الصعيد قالت له من المنصورة)
فانفجر الجميع بالضحك... لكنهم كانوا كلهم يضحكون لأنهم يعلمون أن المنصورة ليست فى الصعيد
أما أنا فكنت الوحيدة التى تضحك لسبب مختلف تماما هو أنى لو كنت سئلت هذا السؤال قبل ذلك اليوم كنت سأجيب نفس اجابة !!!...ما ان قلت لهم :(على فكرة أنا كنت هأجاوب نفس اجابتها ) حتى انفجروا فى الضحك مرة أخرى
أخرجت ليلتها الأطلس من المكتبة و نظرت لخريطة مصر و اكتشفت أن الجغرافيا قد مُحيت من ذاكرتى...وأنه صار لى زمن لم أطالع خريطة مصر !!


9-2-2010



دى بالظبط زى اللى فى الأطلس...بس دلوقتى فى خريطة أجدد

رفيق العمر

لأول لحظة في العمر ألقاه
فلو أدري الكلام لقلت أهواه
رفيق الساعة الاولى أنست به
فعشت بحب ما أوحى به الله
وسابقت الاحبة في تلاوته
وانعم حين ألقاهم بلقياه
ولي شيخ إذا رتلت ألمحه
تقبلني من الإعجاب عيناه


وأبحر في مدى الدنيا وعالمها
إلى زمن تعدد في زواياه
أرى حلقاته فأذوب من وله
ويهتف خاطري الله الله
على حلقاته عشنا طفولتنا
وفي سنواتها الأولى حفظناه
يزيد وداد صحبتنا بصحبته
وتأتلف القلوب إذا تلوناه
وكان الحب للقرآن رائدنا
ومانلنا الأماني البيض لولاه
أتذكر كم تزاحمنا نرتله
فعلمنا إخاء مانسيناه
فإن حفظوه اولادي فأمنية
أنال الله قلبي ماتمناه
وإن الجود للقرآن موهبة
بها يُهدي لنا المولى عطاياه
ومن أحيا كتاب الله أوله
به يلقى الإله إذا توفاه
به يلقى الإله إذا توفاه
_______________
أبيات: ماجد الجبرى
أداء: زيد الفواز والطفل ابراهيم الفواز

البلدوزر

صغيرة كانت عندما جلست خلف أبيها و هو يقود السيارة
تنظر من خلال الزجاج الخلفى للسيارة فتصيح :
( يا بابا.....اجرى بسرعة...البلدوزر هيدوسنا)
كبرت الأن...ترى (بلدوزرات) كثيرة...تحاول أن تصيح لكنها لم تعد تجيد فن الصياح

26-2-2010

مشهد

أُسر بعد سنتين من زواجهما ....خرج بعد ثمان سنوات ضمن اتفاقية لمبادلة الأسرى عندما صار عمرها أربعين
وجدها لازالت بانتظاره عاكفة علي ولدهما الذي لم يره من قبل
عندما سألها : كيف انتظرتني طوال تلك السنوات التي لم نكن نعرف لها أجل
قالت : امرأة انتظرتك اثني عشر عاما قبل أن تتزوجها و هي لا تعرفك....أفبعدماعرفتك لا تنتظر!؟

24-2-2010

النمرة غلط!!!

المفروض لما حد يقول النمرة غلط ...تبقى النمرة غلط....لكن فى ناس ما كانتش قادرة تدرك ده

(1)
تليفون البيت تررررن... ترررررن

-رفعت السماعة وقلت :سلام عليكم
رد راجل صوته يقول انه أربعين خمسين سنة كدة و بيشرب سجاير
- وعليكم السلام ..كريمة موجودة
- لا والله النمرة غلط
-مش ده منزل طارق
- لا حضرتك النمرة غلط
- مش دى نمرة كذا كذا كذا
- اه حضرتك بس ده مش بيت طارق
قام اتنرفز و زعق
- لأااااا ده بييييت طااارق .. و على صوته كمان وكمان وهو بيكمل كلامه بلهجة كأن فى جريمة و هو بقى اللى كشف حلها
"و انتى أووووختى كريـــمـة"
O_O

- طييييييب.....سلام عليكم
طاخ
(فعلا صعب عليا...و صعبت عليا أكتر أخته كريمة ..أحسن يروح يتعارك معاها ويقولها انتى قفلتى فى وشى السكة!!!!)


(2)
ليلة امتحان أناتومى نبات اعدادى صيدلة
ما ينفعش أقفل موبايلى لأن أنا و صحابى بنبعت لبعض نسأل عن حاجات فى المنهج
(طبعا الطلبة اللى بيذاكروا ليلة الامتحان فاهمين كويس أنا بتكلم عن ايه )
رن الموبايل
نمرة غريبة
- سلام عليكم
- صوت دوشة وعيال كتيرة
قفلت
رن تانى... طلع واحد فاضى ...عملت الموبايل سايلنت وسبته ... و أخوكم ده ما بطلش رن لحد الساعة 3 صباحا
42
MISSED CALL
اتصلت بخدمة العملاء وسألتهم اذا كان ينفع أعمل حظر لرقم معين انه يتصل بيا...قالى لأ بس حضرتك ممكن تاخدى رقم مباحث التليفونات وتديهم الرقم
جوايا:
(يااا سلاااام ...هو فى حاجة أصلا اسمها مباحث التليفونات.....كانت فين دى من زمان )
أخدت الرقم
فى أخر مرة بقى رديت على أخوكم الفاضى : بص حضرتك اتصل تانى و نمرتك باذن الله هتكون مع مباحث التليفونات

(ناس ما بتجيش غير بالعين الحمرا ...لو عايزين نمرة مباحث التليفونات...ما تغلاش عليكم...من العين دى قبل العين دى)


(3)
طريقة سخيفة رقم واحد: واحد فاضى يتصل و يسأل سؤااال بايييييخ: انتى تعرفى فلانة
(اسم)
وغالبا اسم فلانة اللى بيستخدمه بيكون اسم منتشر جدا بحيث ان انتى لو دورتى أو حتى لو ما لحقتيش تدورى هتلاقى فى صحابك بنت اسمها فلانة!!!
سارة....هبة....ياسمين... دينا...دعاء ...والذى منه

الطريقة سخيفة رقم اتنين
واحد فاضى _برضه_ يتصل ويتكلم بكل لباقة(بس على مين؟؟...خلاص اتعلمنا..ما بتخدعناش اللباقة ) : الرقم ده حضرتك اتصل عليا
(سواء موبايل بقى أو بيت....بجد ببقى هأتشل)
طيب يا سيدى الفاضل... بفرض ان انا فعلا اتصلت بيكم مع انه ما حصلش...لو أنا عيزاكم هأبقى اتصل تانى!!!!! ....طالما معايا النمرة...بلاش بقى الحركات دى

وفى ناس فاضية بقى تفضل تسأل أسئلة تحقيق ومن كتر ما قلت لها النمرة غلط يبقى فاضل بس انك تقول... ال ن م ر ة غ ل ط ....هذه رسالة مسجلة

(4)

الساعة تلاتة بعد نص الليل
موبايل ضحى أختى الصغيرة رن وهى نايمة
ما ردتش فى الأول قلت يمكن صحابها بيرنوا
رن تانى ... لقيتها نمرة...رديت

- سلام عليكم
صوت شاب... و كأنه ارتبك لما لقى صوت واحدة بترد عليه
وكان بيتكلم بكل لباقة
(احنا قلنا فى رقم 3 بقى... ما تخدعناش اللباقة)
- لو سمحتى الرقم ده رن عليا
( فاكرينها دى الطريقة اللى قلت لكم عليها سخيفة فى رقم 3)
- لا حضرتك ما رنش...انت عارف الساعة كام دلوقتى حد يتصل بحد فى الوقت ده!!
- طيب انتى تعرفى واحدة اسمها ياسمين
(دى برضـــه الطريــــقة اللى قلت لكم عليها سخـــيــــفة فى رقم 3...معايا؟....وبما ان فيه فى حياتى أكتر من ستة اسمهم ياسمين....فبصراحة استفزنى جدااا...وكنت هأدخل فيه شمال ...بس أنا سمعت الصوت ده قبل كدة...فين يا ربى...فين يا ربى)
-شخطت : ياسمين ايه؟؟؟
( ومن الواضح ان ما عندهوش خبره خالص فى موضوع المعاكسات التليفونية_ نحسبه على خير _فبكل حسن نية قال اسم أخته الصغيرة اللى هى بنت عمى)
-ياسمين مجدى
(بس خلاااص ...عرفتــــك)
- انت كريم عباس؟
رد باستغراب
- أيوة!
- كريم....أنا ندى عباس
(طبعا الباشمهندس كريم _باعتبار ما سيكون ان شاء الله_ التقط أنفاسه... و كأنه عايز يقول مش كنتى تقولى من الأول)
- هى جت فيكى....معلش احنا أسفين...بس دى نمرة مين
- حصل خير يا كريم....دى نمرة ضحى... ابقى خلى ياسمين بقى تسجلها عندها....سلم عليهم كلهم سلام عليكم
- يوصل ...و عليكم السلام

يعملوها الصغار ويقعوا فيها الكبار.....يا رب يا ياسمين تكونى سجلتى نمرة ضحى عندك....ولو انى مش مستبعدة_ او أقصد انى شاكة بنسبة 95%_ ان ضحى ممكن تكون هى اللى سجلت نمرتها عند ياسمين أكتر من مرة(عااااادى جدا...الأطفال أحباب الله) فبقت تظهرعلى شاشة الموبايل نمرة مش اسم


(5)
موبايل أختى الكبيرة رن ولما ردت
طلع واحد عايز رامى
(جديدة دى ...قال اسم واحد مش واحدة)
قالت له: النمرة غلط
السؤال البايخ المعتاد: طيب ده موبايل مين؟
( بعد السؤال ده كدة نقدر نوصف بقى الوصف الدقيق ... واحد_ فاضى _ عايز رامى)
فردت : موبايل أى حد تانى غير رامى!!!!!





20-2-2010

يا طيبة يا طيبة يا دوا العيانا
اشتقنالك والهوى نادانا

لما سار المركب نسانى
ساروا والدمع ما جافانى
أخذوا قلبى مع جنانى
يا طيبة يا تيم الولهان

يا طيبة يا طيبة يا دوا العيانا
اشتقنالك والهوى نادانا

قبلتى بيت الله صابر
علنى يوما لك زائر
يا ترى هل ترانى ناظر
للكعبة وتغمرنى بأمان

يا طيبة يا طيبة يا دوا العيانا
اشتقنالك والهوى نادانا

نبينا أغلى أمنياتى
أزورك لو مرة بحياتى
وبجوارك صلى صلاتى
وأذكر ربى وأتلو القراّن

يا طيبة يا طيبة يا دوا العيانا
اشتقنالك والهوى نادانا

بشراك...المدينة بشراك
بقدوم الهادى يا بشراك
فهل لى مأوى فى حماك
أتملى ...فالنور سبانا
نوركم سبانا

يا طيبة يا طيبة يا دوا العيانا
اشتقنالك والهوى نادانا

جليد

أشعر بالبرد.....أشعر بالجمود ...جليد أحاط بروحى... سلبنى القدرة على استقبال الأحاسيس....فقط ذلك البرد وذلك الجمود هما كل ما يصلنى....أكاد أشعر بأن الحياة تهرب شيئا فشيئا من روحى...لا أعلم لماذا يطلق الجليد سراح الحياة و يبقي روحى أسيرة برده القارص.... برفق أيها الجليد فلست تلك الصلبة التى تطيق قبضتك ولست تلك الهشة التى تستسلم...برفق أيها الجليد فان لى قلبا اذا تجمد لن تجدى بعد تجمده قطرات ماء...أيها الجليد فلتدع قطرات الماء الأن تذيبك و تطلق سراح روحى فان روحى اشتاقت لما يُحيـها

20-2-2010

فيونكة خضرا

سمرا و جميلة بضفيرة و فيونكة خضرا
تجري و تلعب وتضحك و عنيها غامقة
فستان بوردة و حلق و غويشة صفرا
نامت في ليل تحلم بيوم فيه تكون واقفة
وسط بنات قمرات و تكون هي نجمة
فوق بعيد شافت نجمة زرقا
حواليها عيون كتير لكن عينيها هي مالها
فيها هموم كتير و الضحكة مش من روحها
همست لها يا نجمة ليه عنيكي شاردة؟
قالت أصل دي دنيا واسعة و وشوش الناس كتير بس مش كل القلوب صافية
زمان كان نفسي أكون نجمة فوق في السما الغامقة
حواليا نجوم كتير لكن أنا عالية
و عرفت نجوم كتير لكنها قشرة
من برا ضوء قالوا لنا عليه جميل لكن حقيقته ضلمة
و قابلت نجوم بقي ليهم قلوب صافية
نورهم يادوب ع القد ينور لهم سكة
و نجوم بقي نادرة نور قلبهم برئ نوّرهم و نوّر لنا طريقنا
و حكولي عن نجوم قالوا إنها خايفة لأحسن يكون نورها ضعيف و تتوه في و سط الزحمة
أو يجي عليها ضوء غشيم يعمي لها قلوبها
اوعي حلمك ياخدك بعيد في ليل طويل
ما تصدقيش اللي يقول إن النجوم لازم لها ليل تنور فيه
مساكين نسيوا إن شمس الدفا بالنهار طالعة
نسيوا إن في نورها خير...نسيوا إنها أطيب
نسيوا انها نجمة!...نسيوا إنها أوضح
ما تحلميش بليل و احلمي بنهار
ما تحلميش بنجوم و لا تحلمي بأضواء
خلي حلمك برئ و ما تخافيش يكون غريب
انسي العيون انسي النجوم و انسي القمر
و افتكري نهار هادي قلبك فيه مش حجر
مش لازم يقولوا جميلة مش لازم يقولوا قمر
مش لازم تبقي نجمة فوق في السما
ممكن تبقي نجمة نورها من الأرض للسما
طالما صادقة النية و بعيدة عن العمى
ما تنسيش إنك قوية و ضفيرتك لسة فيها... فيونكة خضرا

16-2-2010

لو مهما طال بيا الطريق هأمشيه

لو مهما طال بيا الطريق هأمشيه
و أفتح ببانى للأمل وأناديه
وأنسى اللى عيشته من سنين قبليه
تايه ما بين اليأس و الأحزان

اوعاك تقول ان الطريق مقفول
اصبر و بكرة بالأمل هتنول
وارمى توكالك ع الكريم على طول
يزرع فى قلبك من الرضا بستان

يمكن صحيح العمر بيعدى
لكنى حاضن حلمى بتحدى
لا يوم هأسيبه يموت ولا يصدى
ولا يبقى يوم حدوتة كان يا ما كان

اوعاك تقول ان الطريق مقفول
اصبر و بكرة بالأمل هتنول
وارمى توكالك ع الكريم على طول
يزرع فى قلبك من الرضا بستان

كلمات الشاعر /أسامة عبد الصبور

الاغنية كاملة بتتر برنامج خدعوك فقالوا الجزء التالت هنا